2Pe 1 | ZomZIV | STEP | Jesu Christ nasem le sawltakpi Simon Peter in, Eite Pasian le i Honpa Jesu Christ thumaanna tungtawnin kote aa banga a manpha upna a ngahte tungah:

2 Peter 1

1 Jesu Christ nasem le sawltakpi Simon Peter in, ^a

Eite Pasian le i Honpa Jesu Christ thumaanna tungtawnin kote aa banga a manpha upna a ngahte tungah: ^b

2 Pasian le i Topa Jesu theihna tungtawnin hehpihna le lemna adimin note aa hi ta hen.

Sapna le Teelna Kiciansak

3 Ama minthanna le a hoihna tawh hong sampa, amah i theihna tungtawnin nuntak nading le i pasianmi theih nadinga kisam khempeuh ama Pasian vangliatna in hong pia zo hi. 4 Hihte tungtawnin pasian pianngei ah tanh na neih theih nading uh leh lunggulhna gilo in a piansak leitung siatna pan note na suahtak theih nadingun amah in tuate tungtawnin alian pha mahmah le a manpha a kamciamte eite hong pia zo hi. ^c

5 Hih thu hang mahmah in, na theih tawpun na upna uh tungah hoihna, hoihna tungah theihna; 6 theihna tungah pumpi ki-ukzawhna; pumpi ki-ukzawhna tungah sikdona; sikdona tungah pasian-mina 7 le pasian-mina tungah sanggam kikhualna le sanggam kikhualna tungah itna na behlap un. 8 Ahang in, hih hoihnate ah na khan semsem uh leh i Topa Jesu Christ na theihna uhah muibut lohna le gahsuah lohna panin hong hu ding hi. 9 Ahi hangin mi khatpeuh in tuate a neih kei leh muhna tom le mittaw hi-a, ama mawh nasate a kisiansak khit lam a mangngilh zo ahi hi. ^d

10 Tua ahi manin sanggamte aw, note hong kisapna le hong kiteelna a ki ciansak dingin na lawp semsem un. Ahang in, hih nate na hih uh leh na puk ngei kei ding uh a, 11 eite Topa le Honpa Jesu Christ tawntung kumpi-gamah note thupitakin hong kimuak ding hi. ^e

Laisiangtho Genkholhna

12 Tua ahi ciangin tu laitaka na theih uh thutak ah, a kipsa a khosa le tuate a theisa na hi uh zongin hih nate kong phawksak kik tawntung ding hi. 13 Hih pumpi puanbuk sunga ka ten laiteng na theihtheihna uh kong thaksuaksak ding amaan hi, ci-in ka ngaihsun hi. 14 Bang hang hiam cih leh i Topa Jesu Christ in teltaka kei hong theihsak bangin hih puanbuk ka koihkhiat pah ding ka thei hi. 15 Kong paisan khit ciangin hih nate phawk den thei na nuteh cih thei-in ka hih theih tawpin ka hih ding hi. ^f

16 Note tungah i Topa Jesu Christ vangliatna le hong pai kik nading thu kong hilh lai-un, piltaka kiphuak tawm tangthute peuh zui hi loin ama thupina mita a mute ka hi zaw uh hi. 17 Ahang in, a Thupi Minthanna pana aw in ama kiangah, “Hih in ka lung hong kimsak mahmah ka it ka Tapa ahi hi,” ^{▼▼1.17 Mt. 17:5; Mk. 9:7; Lk. 9:35} ci-a a gen lai-in, Pa Pasian tung pana pahtawina le minthanna a ngah hi. 18 Tua mual siangtho tunga amah tawh ka om laitakun kote mahmah in vantung pana hong ging hih aw ka za uh hi.

19 Khuamialna mun khatah khuavak a tan bangin note lungsungah phalvak tung zingsol a suah mateng in, eite in a kicianzaw kamsangte thugen i nei hi; note in, tuate na thusim uh leh na hoih sem na hi ding uh hi. 20 Tuate khempeuh banah, Laisiangtho sunga genkholhna peuhmah kamsangpa in a khiatna a gentawm mawk ahi loh lam na theitel pelmawh un. 21 Ahang in, genkholhna peuhmah mihing deihna pan hi ngei lo-a, Khasiangtho hihsakna bangbangin mite in Pasian tung pana a gen uh hizaw hi. ^h